O le a iai le siitaga o penefiti e amata i le Aso Lulu, aso 1 o le masina fou o Aperila.
O se faasilasilaga mai le matāgaluega o atina’e o aga fesoota’i poo le Ministry of Social Development New Zealand, ua faailoa mai ai, o lenei suiga o le a aafia uma ai le tusa ma le 1.5 miliona tagata o loo i Niu Sila, o i latou o loo maua ni fesoasoani tau seleni e tauala mai le MSD, lea e aofia ai le tusa ma le 436,000 tagata o loo mauaina nei penefiti.
O siitaga nei e masani lava ona faia i tausaga ta’itasi i le vaitaimi faapenei pe a uma ona faia ni iloiloga i le tulaga o iai le tau o le tamāoaiga i le tausaga ua tuana’i atu, ma e tele ina aafia ai penefiti autū e pei o le Jobseeker Support, Sole Parent Support, Supported Living Payment, Youth Payment ma le Young Parent Payment.
O nei suiga o le a siitia nai lo le faaitiitia mai le aofa’iga o loo maua i le taimi nei.
O le faata’ita’iga, mo le tagata nofofua o loo sa’ili se galuega, ua 25 tausaga pe sili atu, i le taimi nei o loo maua le $361.32 i le vaiaso pe uma ona tipi le tax, ae o le a siitia lena penefiti i le $372.55 i le vaiaso.
Mo le tagata o loo sa’ili se galuega o loo iai le to’alua ma se fanau, i le taimi nei o loo maua le $649.22 i le vaiaso, ae o le a siitia i le $669.40 na te maua i le vaiaso.
Mo le matua ua nofo to’atasi o loo maua lana penefiti e $505.80 o le a siitia i le $521.52.
O le penefiti supported living payment mo le tagata nofofua e 18 tausaga pe sili atu, o loo maua le $411.80 i le vaiaso i le taimi nei, o le a siitia i le $424.60 i le vaiaso .
O le supported living payment mo le ulugalii e iai se fanau, o loo maua le $734.12 i le taimi nei, o le a siitia i le $756.94.
Mo se lisi atoa o suiga o le a iai penefiti uma, e mafai ona maua i le upega tafa’ilagi o le workandincome.govt.nz
Fai mai le MSD, e leai se mea e moomia ona faatino e tagata uma o loo maua penifiti e tusa ai o lenei siitaga, auā e okometi lava ona faia suiga i peimeni.
Mai le aso 1 o Aperila o le a mafai loa ona e siaki suiga ua iai le siitaga o lau penefiti pe a tatala lau MyMSD.
