O se faaeaea a o se mitamitaga tele oo mai ai o tala i le avea ai o le ali’i Samoa o Jack Scanlan ma ulua’i tagata Pasefika i Aotearoa nei e faauuina mai le tikerī maualuga i galuega tau agafesoota’i, poo le Doctor of Social Work, e pei ona faaalia i faamatalaga a le Iunivesite o Massey i lenei vaiaso, e lē o toe mamao ona taunuu lea i le si’ui taumafaiga a lea alo o Samoa.
I faamatalaga o Jack Scanlan o sē na galue e fesoasoani i tupulaga talavou e tauala atu i le auaunaga a leoleo ma isi – youth worker, police youth development manager ma sa avea foi ma faia’oga poo se lecturer.
Faamauina o lea alii sa ola a’e i Magele, o le uii o se fanauga e to’aono, ma o sē na faaalia lona lagolago i lona tinā i le tele o ana talosaga talu ai o si ona tua’ā tinā e le’i mafai ona faitau tusi.
Faaalia foi e Scanlan o le tasi foi lea o māfua’aga na ala ai lava ona iai lona naunauta’iga e galue i le matātā o agafesoota’i.
I tala’aga o lea ali, o ia o le ulua’i tagata o lona aiga na mae’a le a’oga i le Kolisi Maualuga, ma auai i a’oa’oga maualuluga i le Iunivesite.
Faamanino ua faaulutalaina po ua faaigoaina e Jack Scanlan ana sa’ili’iliga i si ona tua’ā tinā ia Ululaau, ma o sa’ili’iliga o loo faasino tonu lea i le matāupu o aiā tatau o tagatānuu ‘ese’ese ma saga faamalosia le finau mo ē na aafia i matāupu faapenei.
O le naunauta’iga o lenei alo o Samoa o le avea o ia ma ulua’i tagata e mae’a taumafaiga i nei matātā o le a faaosofia ai le agaga finau o tatou tagata Pasefika ina ia maua le avanoa i a’oa’oga maualuluga ma ia lē gata ai le ola sa’ili’ili.
Puna o Faamatalaga: https://www.facebook.com/share/p/1CJ6uPxf1X/
