Poo e malamalama i tulafono o le auala a Ausetalia?
O se faafesili lea ua agiga i se lipoti i le asō i le 9News ma ta’ua ai o Ausetalia o se atunuu e fai lava si ese foi o ana tulafono tau le alatele.
O avetaavale i totonu o le atunuu ua iai nisi ua faasalaina i ni faasalaga tetele e mafua mai i ni gaioiga sa lei manatu latou e solia ai le tulafono o le auala.
Faataitaiga o le mataupu i le vaping, fai mai nisi setete e solitulafono pe a avetaavale ma vape, fai mai nisi e lē o se solitulafono ae o le a iai ni nai faasalaga pe afai e faalavelavegia ai le faafoeina o le taavale aemaise pe afai o loo aumai ai foi i le taavale ma se tamaitii.
I Niu Sa Uelese lava ia talu mai Tesema 2015 o le faaaogāina o se e-cigarette i le taavale a o iai ma se tamaititi i lalo o le 16 tausaga, o le solia lea o le tulafono o le alatele ma e $250 le faasalaga.
Fai mai le 9News e lelei lou saili ma malamalama lelei i le tulafono o le auala i lau setete ina ne’i faasala faatopetope oe ae e te lē malamalama ma silafia.
