Ua faasala nei e le faamasinoga se tinā e 40 tausaga le matua, ina ua faamaonia moliaga o le faaoolima i lana tama tama e 3 tausaga le matua, ma o se tamaitiiti e iai aafiaga tumau o lona soifua, o le vaega ua ta’ua o le autistic.
O lenei matāupu na alia’e mai i le amataga o le tausaga talu ai, e faapea na matua’i ‘onā lava lea tinā ina ua ia faaoolima i lana tama i fafo o le latou fale, a o matamata uma atu ai le to’atele o tuaoi.
I lipoti na ta’ua ai e leoleo i le taimi na taumafai e talanoa atu i lea tinā i le mea ua tupu ae ua lē mafai ona tautala ona ua faasuā’avā tele lea tinā.
Faamauina na ia tetee i ona moliaga, peita’i na toe suia lana tali i le ioe.
Na faaalia e le faamasino na nafa ma lea matāupu, Judge Stephen O’Driscoll, tulaga o le lu’itau o le nofo to’atasi o le matua e tausi se aiga aemaise o le tausia o se tamaitiiti e iai aafiaga tumau o le soifua na o ia; ma e amana’ia foi tulaga o faafitauli o ia vaega uma ae na te lē talia le oo i le tulaga o sauāga ma le faaoolima i le fanau.
I lipoti mai le leitio faavaomalo a Niu Sila, na faamauina ai faamatalaga e faapea e iai ni matāupu na molia ai foi lea tinā e 40 tausaga le matua na faamaonia, ma o matāupu tau lalata mai o le tausaga e 2018.
Ma ona o tulaga ma’ale’ale o lenei matāupu o lea na taunuu ai le faai’uga a le faamasino e faasala o ia – e ala i le nofo vaavaaia mo le 12 masina – “12 months’ intensive supervision”, ma tuutuuga poo aiaiga, e aofia ai le auai i polokalame toe fuata’i, ua ta’ua o le non-violence programme, counselling, ma lona ‘alofia ai o lona toe tagofia o le ‘ava malosi.
O loo iai pea i lalo o lana vaavaaiga lea tamaitiiti i le taimi nei.
Puna o Faamatalaga: https://www.rnz.co.nz/news/national/583951/christchurch-mother-sentenced-for-assaulting-3-year-old-autistic-son
