Ua nofo taofia nei i le vaaiga a leoleo se tamaitai 30 ma ona tupu tausaga o lona soifua e faatali ai le lauina o lona faasalaga i moliaga e lua o lona to’esea i se auala solitulafono o se tinoitupe e silia i le 20 afe tala o ni seleni o teugatupe a ni tagata i le faletupe o le BSB Bank i Salelologa i Savaii.

O Eseta Atonio sa avea ma Pule o le lālā o lea faletupe i Salelologa mai le tausaga e 2020, ae ua 14 tausaga o galue ai i le BSB Bank. Ua ia ioeina moliaga a leoleo, ma lana faamatalaga i le faamasinoga o faaosoosoga ua mafua ai ona sasi lana faaiuga lea na ia faaaogā ai ni seleni mai ni teugatupe se lua e toe totogi ai tupe a le faletupe na ia faaaogāina.

O le tuuina atu o tolaulauga a leoleo ma le folasaga a le loia a leoleo na talosaga ai Eseta mo se isi avanoa mo ia ona ua na o ia e faigaluega o lo latou aiga. Na faamanatu iai e le faamasino ma fesili iai, pe na te manatua o le isi foi tagata sa pule i le lālā o le faletupe lava lea i Salelologa na ia faia foi se solitulafono faapea ma faasala ai i le 3 tausaga ma le 6 masina, ma sa ioe lē ua molia na te manatua.

O Iuni ma Iulai o le tausaga na te’a nei na tupu ai le solitulafono. Na faailoa i taualumaga o lenei mataupu ua mae’a ona toe totogi e lē ua molia i le faletupe se vaegatupe e 12,335 tala ma o se itu lelei lea mo ia i le iloiloina o se faaiuga peitai ua faailoa e le faamasino ia Eseta, o se faasalaga faafalepuipui e talafeagai ma lana solitulafono.