O palota laiti e 7 mo itumalo faapalota ua avanoa nei o latou nofoa ua faamoemoe le malo e amata faaaoga isi teuteuga o le tulafono o faigapalota na amata talanoaina i le Palemene i le Aso Lua 28 o Setema.

O teuteuga nei ua aofia ai le tulaga agavaaa o sui tauva i le monotaga e le gata i le nuu ae ua toe faaofi ai foi le tautua i mea fai a Ekalesia i le agavaa o le monotaga. O lea foi ua teuteu le tulafono autu o faigapalota i le suia o le faitauga o aso e atoa ai le 3 tausaga e nofomau ai i Samoa se matai e fia tauva faapea ma le faaopoopo o se isi tagata o le nuu o se itumalo

palota na te faamaonia se monotaga a se sui tauva pe afai ua musu le sui o le nuu poo le sui tamaitai o le nuu e saini le pepa e faamaonia ai le monotaga.

O lea tagata faaopoopo e filifili mai e le Komesina o Faigapalota mai le li’o o matai o loo i totonu o le faiganuu. O se tasi lea o faafitauli sa tulai mai i nisi o palota ua mavae o le fiu e saili le pulenuu e saini se pepa faamaonia o se sui tauva ae maua ane se molimau ua ave ese sui tauva o le itumalo ua faanofo mamao ina ia lē maua e lea sui. 

O le isi teuteuga o le lē toe mafai lea e se sui faatu na ia lu’iina se agavaa o se sui tauva i le faamasinoga ona toe faaui i tua lona suafa mai le faasologa o sui tauva o se itumalo pe afai e manuia lana lu’i i le faamasinoga.

O le tasi vaega o le teuteuga i lea tulaga e faatoa mafai ona faaui i tua le suafa o se sui tauva na ia ave se tagi i le faamasinoga pe afai o ni mafuaaga tau i ni gasegase o aafia ai lona soifua.

Mo le silafia ao lumanai le palota tele ia Aperila na ave se tagi a se sui tauva mai le itumalo palota o Lepā na lu’iina ai le agavaa o le monotaga o se sui tauva o le vaega faaupufai o le Tautua Samoa.  

Na talia lea talosaga ma faaleaogaina e le faamasinoga le tulaga agavaa o lea sui tauva ae oo ane i le aso e faamuta ai le toe faaui i tua o suafa o sui faatutū na lesitala mo le palota tele ua maea ua toe faaui i tua le suafa o le sui tauva o lea itumalo na faauluina le mataupu ma tuuina atu i le faamasinoga.

O le mafuaaga foi lea na toatasi ai le sui tauva o le itumalo o Lēpa na lesitala ma lē palotaina ai le tofi o lea itumalo. Ua ioeina uma le itu a le Mālō faapea le ituagai i le toe foi e faia falepalota faapitoa ma taofia ai tulaga sa molimauina i le palota tele Lea na faamalosia ai tagata palota o ia itumalo e agai i o latou nuu ma afioaga e fai ai a latou filifiliga. 

O se tasi o teuteuga o le palota muamua poo le pre polling lea o le a lē toe fa aso e fai ai ae na’o le tasi ma ua aiaia foi i lea teuteuga e faatoa tatala ma faitau le taunuuga o palota i le palota muamua pe a faitau faatasi ma se taunuuga o le faigapalota tele faapea palota laititi.