Saunoa le minisita o leoleo ma falepuipui, Afioga Faualo Harry Schuster i le aso ananafi, o lana asiasi mai i Niu Sila nei ma faatasi atu i ni fonotaga ma pulega a le matagaluega o falepuipui ma le toe fuata’ina, na mafai ai ona feiloai atu i nisi o alo o Samoa o loo galulue i le pulega o na matagaluega i Niu Sila nei, ma faaleo ane ai lo latou naunau e fia lagolago atu i le faigamalo a Samoa i le matagaluega o leoleo ma falepuipui.

Saunoa Faualo i lana faatalanoaga ananafi i luga o le Radio Samoa, ailoga a fia oatu nei alo o le atunuu e toe fia galulue i Samoa aemaise i le tulaga maulalo o totogi peitai o lona mitamitaga lea, ona sa folafola ane lava e nei alii ma tamaitai, ua latou nofosauni e fesoasoani atu pe a tāpā mai latou i se taimi.

Sa ta’ua e Faualo le moomia tele o lenei fesoasoani aemaise le fuafuaga a le matagaluega e toe tuu faaeseese le matagaluega o leoleo mai le vaega o falepuipui ina ia eseese a la pulega. Ma e moomia ai lava le fesoasoani a i latou nei ua iai tomai faapitoa i le auaunaga o le toe fuata’ina o i latou o loo nofosala i le falepuipui.

O i latou ua ofo la latou fesoasoani e naunau e foi atu i Samoa mo se vaitaimi poo taimi foi e agai atu ai mo ni faiga malologa i Samoa, ae mafai ona faatulaga ai ni seminā e latou te faatino e faasoa atu ai tomai ia i latou o loo galulue i Samoa.