Ua leai nei se fale e alu iai lē ua molia, ma o loo masalomia o lea na susunu e nisi ma e fesootai ma gaioiga a le alii 28 tausaga le matua lea ua molia i lona sosoaina o le talavou 15 tausaga i le taavale i Ngaruawahia i Waikato i le Aso Lulu o le vaiaso talu ai.

E 15 tausaga o le talavou o loo tulua le ola ma le oti i le falemai i Waikato ona o manu’aga tuga mai le taimi na so’a ai e le taavale a lē ua molia, mulimuli ai toe alu faalua iai le taavale i luga o lona tino.

Ua lipotia e le Newshub e silafia e lē ua molia le talavou o loo taumate lona ola i le falemai.

O le Aso Toonai na faatoa molia ai lē o loo taofia nei i lalo o le vaavaaiga a leoleo, ma o lea na tulai i luma o le faamasinoga ananafi ma le faamoemoe e toe tatala i tua i lona fale i lalo o aiaiga, peitai ua leai nei se fale o lea na susunu i le po o le Aso Sa.

O se tala mai le ofisa o le tineimu e taunuu atu ua tele ina faaleagaina e le afi le fale i Havelock Rd e tusa lea o le lata i le itula e 9 i le po o le Aso Sa.

Na toe taofia ai i le ofisa o leoleo seia oo i le aoauli o le asō a o saili se isi fale.

O le taavale e fesootai ma lenei mataupu o lea na toe maua i le po o le Aso Tofi ua lafoai i se tasi o nofoaga faasao e lata i Tauhei ma ua talosaga mai ai ma leoleo i soo se tasi e silafia nisi faamatalaga e fesootai atu.

Saunoa le pulenuu a Waikato, Jacqui Church, ua faaalia lona popole tele i le mea ua tupu aemaise ai o lagona alofa mo le aiga o le talavou 15 tausaga.

Puna o Faamatalaga: Large blaze at home of Ngāruawāhia 28-year-old accused of hit-and-run of teenager being treated as suspicious – NZ Herald