O le feiloaiga a tusitala ma sui o le komiti o le Mau o le Sitiseni Samoa i Niu Sila, ua ave ai le tuualalo i lo tatou atunuu i Samoa ina ia faaalia o latou lagona lagolago e ala ia latou folasaga tusitusia pe tuu fofoga poo submissions.

O le naunautaiga o sui o le komiti ia tele ni manatu e tuuina atu i le komiti a le Palemene o Niu Sila o le a iloiloina le tulafono taufaaofi a le alii faipule mai le Atu Kuki o loo taulamua i le toe faafoi mai o le sitiseni o tagata Samoa i Niu Sila i latou na soifua pe fananau mai i le va o le tausaga e 1924 ma le 1949, taimi ia o loo tumalo Niu Sila i le pulea o Samoa. 

Le ta’ita’ifono o le komiti o le Mau o le sitiseni Samoa i Niu Sila le afioga Anae Lupematasila Arthur Anae, ma Tofilau Nina Kirifi Alai, o se sui o le komiti.

O le feagaiga faauo a Niu Sila ma Samoa le Treaty of Friendship e manatu le komiti, e tatau ona faaaogā e Malo e lua e iloilo ai se aiaiga e faatino ai le toe maua o lea tulaga tagatanuu Niu Sila o tagata Samoa na soifua mai i le taimi o pulega a Niu Sila i lo tatou atunuu, pe afai ae talia ma pasia e le Palemene o Niu Sila le tulafono taufaaofi o loo finauina ai le toe maua o lea faamanuiaga tau tagatanuu o Niu Sila poo le sitiseni. 

O le ogatotonu o lenei vaiaso ua feiloai ai sui o le komiti ma le atunuu lautele i se faatasiga i le maota o le Tuutuuileloloto.