Ua agiga i luga o upega tafailagi ma le social media alofaaga ma moomooga alofa mo si tamaitai loia mai Aukilani lea ua lipotia na maliu i le vaiaso nei i se faalavelave na lavea ai i se taavale ae toe o ni nai minute tulai i le faamasinoga mo le faaauauina o ona tiute faaloia.
Ua faamaonia mai e leoleo o le tamaitai loia o Telise Martin na maliu i le faalavelave lea i Corinthian Drive i Albany i le Aso Lua i le tea o le ‘afa o le 9 i le taeao.
Fai mai lipoti na maliu Martin a o aveina atu i le falema’i i Aukilani ona o le ogaoga o manuaga.
O molimau a lana aufaigaluega mai le ofisa loia o Martelli McKegg Lawyers, o ia o se loia sinia ma o se tasi ua iloga i le galuega.
Na aoga i le Iunivesite o Aukilani ma maua ai ona faailoga faaletulafono ma le accounting ma faaulufale ai i le pa i le Faamasinoga Maualuga i le 2015.
E molimau nisi na iai i le nofoaga na tupu ai le faalavelave e faapea na vaaia se tamaitai e talitonuina o Martin lea, sa tu i tafatafa o le faitotoa o le pasese i le pito i tua o se taavale ae lavea ai i se van sa faaaogā i auaunaga faapisinisi na agai mai luga o le aega i lea faaitu.
Fai mai leoleo o loo faia pea a latou suesuega i le taimi nei.
