Ua tapena le loia a le afioaga o Leauvaa e tuuina atu i le Faamasinoga Maualuga i le Aso Lua o le vaiaso nei, ni molimau o le a latou faailoa le faaleagaina o meatotio i se gaioiga ua faia e nisi o le nuu o Afega, ua latou lē usitaia ai le poloaiga ua tuuina mai e le faamasinoga ina ia taofia le galuega ae se’i suesue ma iloilo muamua le talosaga a Leauvaa lea ua lu’i ai teuteuga fou o le faavae ma le tulafono o fanua ma suafa o le tausaga e 2020.
O le Aso Faraile na tea nei na fofogaina ai le tagi a Leauvaa ua tuua’ia ai Afega i le lē usitaia o le poloaiga.
Le afioga Salā Josephine Stowers o le loia o loo tulai mo le afioaga o Leauvaa.
Ua faailoa e le Faamasino Sili i taualumaga o lenei mataupu i le faaiuga o le vaiaso ua mavae, o le aso 16 o le masina fou o Me e suesue ai e faamasino e toatolu le lu’i faaletulafono a le afioaga o Leauvaa, lea o le a tauaveina ia iloiloga e le Faamasino Sili, afioga Satiu Simativa Perese, o le tamaitai faamasino o le Faamasinoga Maualuga, afioga Niavā Mata Tuatagaloa, ma se faamasino mai fafo o loo seei i le faamasinoga o talosaga toe iloilo a Samoa.
