Ua faamaonia mai e leoleo le molia ai o se alii 59 tausaga le matua ona o se faalavelave na lavea ai se pasi la’upasese ina ua feto’ai le pasi na ia aveina ma se laau i le auala i Elliot St i Pahurehure i Aukilani i le lua vaiaso talu ai.

I lipoti mai leoleo, ua valaauina nei lea alii e tula’i i luma o le faamasinoga i se taimi o i luma e tali i lona moliaga o le ‘avetaavale faatamala ua mafua ai ni manu’aga.

Na ta’ua e le sooupu o le ofisa o leoleo, o loo faaauau pea su’esu’ega i lea matāupu. 

Mai le ofisa o le fesoasoani muamua, na iai i lea matāupu le St John, e to’avalu tagata na faatino iai a latou galuega fesoasoani ma faia ni siaki.

O le to’atolu na ave mo iloiloga i le falema’i i Middlemore, ona o le to’alua o lea numera na fai lava sina tigaina ae o le tasi, e faamauina na manu’a mitimiti.

O le isi to’alua na aga’i lava la’ua i se tasi o falema’i laitiiti poo le medical centre, e le’i iai se tulaga e faapopoleina ai, ae o le isi to’atolu e to’avalu ai ē na aafia, na togafitia lava i le nofoaga na tula’i ai le faalavelave. 

E māua foi i lipoti le faailoa ai e le ulua’oga ma faia’oga o le Rosehill i mātua, sa iai nisi o fanau a le a’oga na iai i luga o le pasi i le taimi na aafia ai.

Puna o Faamatalaga: https://www.1news.co.nz/2025/05/19/man-charged-after-students-injured-in-south-auckland-bus-crash/