E 46 tausaga le matua o le tamā Aukilani i Sisifo ua molia nei i le fasioti tagata faamoemoeina e tusa ma le maliu o le tina na maua i le fale i le vaveao o le Aso Sa faato’ā mavae atu.
O le latalata i le tasi i le vaveao o le Aso Sa lea na maua ai e leoleo le tino maliu o le tina i se tasi o fale i Massey, ma na amata suesueina mai ai lona maliu o se tasi na faaoo iai e se isi le oti.
O loo faaauau pea suesuega a leoleo i le fale na maua ai le tino maliu i lea aso ma o le asō foi e tulai ai i luma o le faamasinoga faaitumalo i Waitakere lē ua molia.
E ese mai le mataupu lenei, o le afiafi foi ananafi na amata suesueina ai le isi foi mataupu faapea na lipotia mai Kapiti Coast, lea ua uma ai le soifua o le alii ona o manu’aga na tatui ma o lea na tupu i Matu o Ueligitone.
O le latalata i le 5 i le afiafi ananafi na lipotia ane ai i leoleo, ma e ui i taumafaiga a sui o le soifua maloloina e laveai, ae na maliu ai lava i le nofoaga na tupu ai.
Puna o Faamatalaga: Man charged with murder after woman’s death in Massey, West Auckland – NZ Herald
