Ua i luma nei o le faamasinoga se mataupu na faaulu ai se tagi i leoleo e mafua i le fai faamalosi o se pepa e lesitala ai se suafa matai, ae o loo iai le tuua’iga e faapea e le’i faia se saofa’i.
O le afio’aga o Lalomanu i Aleipata o loo molia mai ai e leoleo le Pulenuu o lea afio’aga ona ua tuua’ia i lona saini faamalosi o le pepa saofa’i ma taumafai ai e ave e lesitala le suafa matai ae e lei faia se nofo e usu ai le nuu e pei o tu ma aga masani pe a faia ni faafotu tupu ma faafotu o le vaaulu i nuu ma afio’aga o le atunuu.
O loo molia faatasi le pulenuu ma se tamalii o loo tuua’ia i lona ave i le ofisa o faamasinoga o le pepa saofa’i mo le lesitalaina.
O loo molia ai lea tamalii sa avea ma Faipule o le Palemene i se paea’iga ua mavae, i lona ave o ni faamauauga sese i le ofisa o Faamasinoga o Fanua ma Suafa.
O le aso 2 o le masina fou o Tesema o le a toe valaau ai moliaga o i la’ua ua molia, ma e tatau ona oo atu iai ua maua se loia e tula’i mo le pulenuu.
