E lima moliaga o le faia o faiga faaālatua i le tuuina atu o tupe ma taumafa faapea ni faasalalauga faatosina solitulafono i luga o upega tafa’ilagi, ua molia ai e se matai le tofa Ulugia Mata’u Matafeo le Minisita o Faamasinoga ae o le tofi faipule o Aana Alofi Numera 1 le tofa Fesola’i Apulu Tusiupu Tuigamala.
O ia moliaga ua faaulu atu i le Faamasinoga Faaitumalo ua finauina e se loia i le aiaiga faaletulafoo ua ta’ua o le private prosecution, poo se faamasinoga tau moliaga solitulafono e finauina e se loia galue tuto’atasi ae ua lē o se loia mai le ofisa o le Loia Sili lea e finauina tuua’iga o moliaga solitulafono poo le prosecution.
O le loia o Alex Su’a o loo finauina moliaga a le itu tagi ae o le tama’ita’i loia, le afioga Mauga Precious Chang o loo tula’i mo le Minisita o Faamasinoga.
I le valaauina o le matāupu tau faamasinoga lenei i le Aso Lua o le vaiaso nei, ua tuu avanoa le faamasinoga i le loia mo le itu tagi e tuuina atu ai se tapenaga e tusa o le talosaga a le loia a lē ua molia e fia iloa poo ai tonu o loo i tua o moliaga faasaga i le minisita.
Ua māfua lea talosaga ona o le taimi e tuuina atu ai se finauga mo totogi o le faamasinoga poo court cost.
Ua lē tuuina atu ai se tali a Fesola’i Apulu Tusiupu Tuigamala i moliaga se’ia tali muamua atu le itu tagi i le talosaga a lana loia.
O le Aso Lua o le vaiaso a sau e toe valaau ai lenei matāupu tau faamasinoga ae o moliaga ma tuua’iga ua faasaga i le Minisita o Faamasinoga, afai e faamaonia o le nofosala a lē itiiti mai e lima tausaga i le falepuipui.
O se faasalaga e mafai foi ona faasala ai le tagata na taliaina ni faaoloaga i le taimi o se faigāpalota, mai le tagata ua faamaonia ona moliaga.
