Ua molia e leoleo le avepasi o le pasi o le Laumosooi lea na lavea i Malifa i le Aso Gafua o lenei vaiaso, ma o moliaga o le ave taavale faatamala ua maliu ai se tagata, ave taavale faatamala ua manunu’a ai isi o le pasese ua tuuaia ai le avepasi.
E faailoa e leoleo i le Aso Lua le molia o le avepasi, ae o le po o le Aso Gafua na maliu ai se tamā matua o se tasi o le toafā o le pasese na taofia ona e tuga o latou manu’aga.
Ua faailoa i lipoti o le pasi e lei pasia e fealuai ona e iai vaega sa faatonuina e tatau ona faaleleia.
O nisi ia o moliaga faaopoopo e ono faia e leoleo a o faagasolo ai suesuega.
Ua avea le toe aafia o se isi pasi laupapa o fausaga tuai o pasi o loo faaaogā pea i lo tatou atunuu, ua tulai mai ai se fesili, pe ua lē tatau loa ona taofi le toe faaaogāina o ia fausaga tuai o pasi la’upasese, ae tau loa o pasi faamalū o loo aumaia i fafo e feafioa’i ai le atunuu.
I se tasi o faalavelave tau taavale ua tusa nei ma le vaiaso ona tulai mai lea na maliu ai se tamaitai Saina i se vaega o le alatele i Vailoa Faleata o loo iai le pamu penisini, ua taofia ma molia e leoleo se alii 38 tausaga.
O ia lea o loo tuuaia na aveina le taavale na aafia ai le soifua o lē ua maliu.
O le aso 16 o Oketopa o le a tulai ai lē ua molia i le faamasinoga.
