Ua folafola e leoleo i le asō i NSW ua o latou molia tagata e to’a 19 i le mae’a ona o latou mauaina o le tusa ma le silia i le 80 miliona o le tau o laau faasāina o le mariuana ia latou osofa’iga na faia i fale i NSW i masina ua tuana’i atu.
O le su’esu’ega o se vaega o le Strike Force Heradale a leoleo i Niu Sa Uelese ina ia sa’ilia ai i latou o loo totōina le laau faasāina ma fai ai pisinisi e ala i le faatauina e faaaogā ai sootaga faavaomalo.
Fai mai le 9News na amata mai i le aso 3 o Aperila o le tausaga nei na mata’itū e leoleo le vaega lea ma o latou osofa’ia ai se fale i Kemps Creek i le itu i Sisifo o Sini.
O iinā na pu’eina mai ai ni alii se to’alua, 32 ma le 35 tausaga le matutua ma se tamaitai e 41 tausaga le matua.
Ua faailoa e leoleo e silia ma le 5,000 laau o le mariuana na mauaina e aofia ai osofa’iga na faia i fale i Shellharbour i le itu i Saute o Sini.
Ua faamaonia mai e leoleo na o latou pu’eina ai alii e to’a 6 ma tamaitai e to’a 4.
O le isi osofa’iga na faia i se fale i Bringelly i Sini lava foi ma pu’eina ai isi alii e to’atolu ma a tuufaatasi i latou uma ua molia e to’a 19 ma ua faatalia nei aso e tutula’i ai i luma o le faamasinoga i moliaga o le aofia ai i ni kulupu faasolitulafono ma le umia o laau faasāina.
Puna o Faamatalaga: https://www.9news.com.au/national/more-than-80-million-dollars-worth-of-cannabis-seized-by-nsw-police/a064b25e-2ee8-40d1-8803-089d5f5cc3de
