O loo taofia i le potu mo gasegase tigaina i le falemai i Motootua, se tama ua 50 tausaga o lona soifua mo togafitiga e faasaoina ai lona ola e mafua i ni manu’a tuga mai se agaese.

Ua faaalia e leoleo i lipoti o le faaiuga o le vaiaso na tea nei, o lē ua molia i le faaoo o ni manu’a ogaoga ma tuga ua taofia i le vaaiga a leoleo a o faagasolo pea suesuega.

O le mae’a o se galuega o se pasese sa tauave e le taxi a lē ua aafia na taofi ane ai lana taavale e lē ua molia ma la malaga ai i Tuanaimato lea na tupu ai le faalavelave.

Ta’ua e se lipoti e leai se tupe e totogi ai le pasese o lē ua molia pe o le mafuaaga lea o lona faia o le solitulafono.

Ae o le taimi na faatino ai le faalavelave na mafai ona maua e le avetaavale se fesoasoani i le agalelei o nisi tagata na latou iloa muamua le mea na tupu, lea sa latou valaau ai le taavale ave ma’i mo se fesoasoani ma logo foi ma leoleo i Tuanaimato.

O le tamaititi 15 tausaga ua faailoa e leoleo o se tama a’oga i se kolisi maualuga e lē o faailoa e leoleo poo ai.