Toeitiiti atoa le tausaga talu ona fasiotia le sui o se kegi tietie pasika i Sini i le itu i Sisifo ae o lea faatoa pueina e leoleo le tagata ua feta’ua’ina o ia lea sa faataunuuina lea solitulafono.
O Marvin Oraiha 24 tausaga na fasiotia ma fana e le tagata i le driveway o lona fale i Elizabeth Hills i le aso 22 o Me i le tausaga na tea nei.
E lua taavale e iai sootaga i le faalavelave lea na maua ua susunu i se nofoaga e lata ane i Bonnyrigg Heights ma Green Valley.
O le vaiaso nei la ua pueina ai e leoleo se alii e 23 tausaga mai Glen Alpine ma faia loa iai moliaga o le fasioti tagata.
Ua mae’a ona molia e leoleo isi tagata e toaono i le faalavelave lava lea ma o loo i luma lava o le faamasinoga le mataupu.
