O le naunautaiga ma le lagona o le susuga i le faiaoga ia Fata Muliagatele Brian Lima ma lana pulega, o le auai atu o le Manu Samoa Seven i le Olimipeka i lenei tausaga i lona taimi muamua, o le a taumafai ai mo se pine auā le tapuaiga a le atunuu.
Peitai ua lē ogatasi le futia ma le umele e pei o lea muagagana a le atunuu.
Ua ese foi le naunau atu o le faiaoga ae ua lē ogatasi ma le taumafaiga a alo ma fanau o le atunuu o loo faatinoina le taaloga.
O le Manu Samoa sa talamalae ma le ‘au a Ausetalia i taaloga o le taitoafitu, na malolo ai le Manu Samoa i lana taumafaiga muamua i le 21 Ausetalia i le 14 a le Manu.
O le taaloga lea, sa tatau ona malo ai le Manu Samoa ae peitai o le faatamala na mafua ai ona faia’ina.
O le taaloga lona lua ma Argentina e lei manuia foi lea taaloga, na faia’ina i ‘ai e 12 i le 28 a Argentina.
O lana taaloga mulimuli ma Kenya sa manumalo ai, i ‘ai e 26 i le leai a Kenya.
Ona faatalitali ai lea o le Manu Samoa i le i’uga o taaloga a Pool taitasi pe ono maua ai sona avanoa e see atu ai i luga auā le sailia o pine o le Olimipeka.
Na mae’a Pool taitasi ma foliga mai ai ua lē maua se avanoa o le Manu Samoa i ‘au e 8 pito i luga auā le finauina o pine.
O le sailiga o ‘au pito i lalo o le taamilosaga na taalo ai Samoa ma Iapani ma manumalo ai i ‘ai e 42 i le 7 a Iapani.
