Fai mai o le pomuina e Isaraelu o se falema’i i le itu i Matu o Gaza ua faaleagaina uma ai ma vailaau mo togafitiga, o se faamatalaga lea mai Malo Aufaatasi.
O sapalai ia sa matua’i mana’omia mo togafitiga ae faato’ā lima aso talu ona kiliva atu i le falema’i i se gaioiga fai faatasi a le UN ma le WHO le faalapotopotoga o le soifua mālōlōina a le lalolagi.
Fai mai le sooupu a Malo Aufaatasi o Stephane Dujarric, ua lē mafai ona gaioi le faia o se isi galuega a le aufaigaluega lavea’i ona o le faaleagaina o lea uta tele o sapalai.
Ua lipotia e le CNN se faamatalaga mai ia Isaraelu latou te lei iloaina se osofa’iga i le falema’i lea o Kamal Adwan peitai o loo iloilo i le taimi nei lea tulaga ma ua o latou ta’ua foi o loo iai le ‘aufaatupu faalavelave a le Hamas lea e i totonu o le falema’i lenei.
O le isi osofa’iga na faia a Isaraelu i se nofoaga i Gaza e lata i le refugee camp ua maliliu ai a itiiti mai pe to’a 13 ma le 30 o loo manunu’a.
Ua faailoa foi i le asō ua taunuu atu sui mai Amerika i Sasae Tutotonu mo le finauina o se filemu i lea itulagi.
I le mataupu ia Iran ma le tau faaataata ane o ni ana gaioiga faasaga ia Isaraelu ua uma ona saunoa se ta’ita’i’au o le vaega’au a Isaraelu e maualuga le tulaga ua oo iai le sauni a le atunuu mo se gaioiga e faia ane e Iran.
O loo iai lipoti e to’a 7 ua maliliu i Isaraelu ona o osofaiga a le Hezbollah.
Puna o Faamatalaga: https://edition.cnn.com/world/live-news/israel-iran-palestine-gaza-war-10-31-24-intl-hnk/index.html
