Ua faailoa mai e le Komesina o leoleo le susuga Auapaau Logoitino Filipo, o le aso 25 o le masina nei o Iulai o le a tutulai ai i le faamasinoga alii e toalua ua molia i le umia o ‘aisa poo le meth, o paipa, ma ni masini faatekonolosi e aofia ai ma ni telefoni feavea’i, ma se tinoitupe e $5,000 tala.
E toalima na taofia e leoleo i le osofaiga i Moamoa talu ai nei, ae toalua ua molia i le umia o pauta faasāina poo nakoti o le ‘aisa ma isi vaega e pei ona faailoa atu.
Faaalia e le Komesina o leoleo lona faafetaia o le atunuu o loo lagolago i le latou galuega o loo sailia ai nofoaga o loo faagaioi ai faiga solitulafono e fesootai ma laau ma pauta faasāina i totonu o le atunuu.
O le toalua ua molia i le osofaiga i Moamoa ua faaalia e Auapaau ua aofia ai ma se alii o loo faauluulu iai le vaega o galuega faasuetusi a le faalapotopotoga o le faaputugatupe o le lumanai manuia o tagata le NPF ma ua faamalolo lē tumau e talia ai le taunuuga o lona faamasinoga.
O le tele o solitulafono ua maua e leoleo faasino i le ‘aisa, e lei maua lava ni mau e faamaonia ai o ia pauta faasāina ua mafai ona gaosi i Samoa.
O le talitonuga o leoleo o nei ituaiga o nakoti e aumai mai fafo ua uma ona gaosi.
