O se vaaiga i le tamaoaiga o le atunuu ma le tulaga i le sao o tupe faamomoli mai fafo e pei ona iai le lipoti a le Faletupe Tutotonu mo le masina o Aperila, ua faailoa ai le maualuga o tupe faamomoli mai fafo i lea masina o le tausaga nei.

E 14 tesimale 2 miliona le siitaga o tupe faamomoli mo Aperila i se aofaiga e 57 tesimale 5 miliona na tafe mai i le tamaoaiga o Samoa ma o se tupe tele lea ua ausia pe a faatusa ia Aperila o le tausaga na te’a nei. Faaalia e le faletupetutotonu i lea lipoti mo tupe faamomoli mai fafo ma tagata asiasi mai i le atunuu e ui ina faapea o loo i se tulaga faaletonu le tamaoaiga o atunuu ona o aafiaga o le faama’i Koviti-19, ae mo Samoa lava ia i tupe lafo mai fafo o loo siitia pea i  se tulaga maualuga.

O le aofaiga o tupe faamomoli foi mo le tausaga faaletupe o loo iai nei 2021 i le 2022 ua faamauina e $590 miliona tala Samoa. O se siitaga e 17 tesimale 8 pasene. O Ausetalia lava ia mo le masina o Aperila o le tausaga nei o loo numera tasi i tupe faamomoli na lafo mai ai e 8 tesimale 9 miliona, pito atu iai Niu Sila e 4 tesimale tasi miliona, o Amerika Samoa e 0 tesimale 7 miliona, o le Iunaite Setete o Amerika e 0 tesimale 4 miliona, ma tupe lafo faamomoli mai isi atunuu e 0 tesimale 04 miliona tala.