Ua mae’a taaloga a Malo o le Taupulega, ma ua sauni le aumasii a Samoa e toe taliu i fanua e pei ona faamoemoe o le Aso Tofi nei o le a taunuu ai le autaalo a le atunuu.
O le taualuga o ia taaloga faavaomalo sa tausinio ai atunuu e 74, ua maoa’e ai le taumafai o alo ma fanau a Samoa sa fai ma sui o le atunuu i ia taaloga tetele a le lalolagi. I atunuu e 43 na ausia le tulaga o le manumalo i pine, o le ‘au a Samoa ua faamautu lona tulaga 19, i le aofa’iga o pine na ia maua i le tasi le auro ae fa pine siliva.
O le fā o pine e aofia ai le pine auro ma siliva e tolu na maua mai lea i le ausiisii u’amea mamafa, ma le pine siliva i le taaloga o faipelega poo le fusu. O Fiti ua faamauina lona tulaga 29 i le fā o pine na manumalo ai o siliva uma ae leai se auro. O Papua Niu Kini ua saofa’i i le tulaga 36 e tasi le pine siliva, o Nauru ua maua le tulaga 41 ua na o le pine apamemea, o Niue e tasi le pine apamemea ua saofa’i i le tulaga 42, ma Vanuatu e tasi foi le pine apamemea ua ia maua le tulaga 43.
O taumafaiga ia a atunuu o le Pasefika ma lenei faaitulagi sa auai i taaloga a Malo o le Taupulega, ae o autaaalo ua sili ona maualuga lo latou taumafai, ua tulaga muamua ai Ausetalia e 178 le aofa’i o ana pine na manumalo ai, ma e pine auro silia foi e 67. Tulaga lua Egelani e 176 pine ae 57 ana pine auro, tulaga tolu Kanata e 26 pine auro na ia maua i le aofa’iga atoa e 92 pine na maua e lana autaalo, tulaga fā Initia e 61 pine na ia maua ae 22 pine auro, ma Niu Sila i le tulaga lima e 20 ana pine auro ae o le aofa’iga atoa o pine na maua e Aotearoa e 49.
O le isi fā tausaga o lumanai o le a faia ai isi taaloga a Malo o le Taupulega a Peretania ma o le a talimalo ai le atunuu o Ausetalia ma o le faaono a’i lea ona talimalo lea atunuu i nei taaloga. O le a faia taaloga o sosoo ai nei i le setete o Vitoria ia poo Melepone.
