E toasefulutasi le aunofosala i le falepuipui i Tanumalala e aofia ai tamaitai e toalua ua mae’a se aoaoga tau tomai i le faaaogaina o masini komepiuta sa auai, ma ua faamanuiaina ma maua o latou tusipasi.
O se aoaoga tāua e maua ai ni o latou tomai aoaoina i le faaaogaina o ia masini, auā e tasi lea o galuega o loo pito manaomia o tagata e popoto i le faaaogaina o computers.
O le kamupani o le SSAB poo le Samoa Stationeries And Books sa faatinoina le aoaoga, ae fesoasoani iai le pulega o faailoga ma tusipasi le Samoa Qualifications Authority i le faatupeina.
O se taimi muamua lea ua amanaia ai e le pulega o tusipasi ma faailoga se aoaoga faapea, mo ē o nofosala i le falepuipui i le naunautaiga, e faaaoga lea avanoa e saili nisi tomai e mafai ona latou faaaoga i le lumanai, pe a mae’a ona tuli o latou faasalaga.
O loo taulai taumafaiga a le pulega o falepuipui e pei ona faailoa i se pepa o faamatalaga, e saili avanoa e maua ai aoaoga e faaaoga iai le taimi o i latou o loo tuli faasalaga, ina ia foi i o latou aiga ae ua iai se isi laasaga tāua ua ausia mo le vaai mamao i se manuia o le lumanai.
