O loo galulue nei leoleo e faamautu nisi o tulaga e faatatau ile mataupu ua lipotia mai ile aso mai Kalaiesetete ua maua atu ai se tina pe a male 80 tausaga le matua ma sana tama tama pe 40 tausaga le matua, ua maliliu I totonu o lo latou fale.
Ua lipotia mai e le ZB ole tina lea sa aumau ma lana tama lea I le latou fale ae o loo taua foi I le lipoti e foliga ua fai si umi o se taimi talu ona maliliu ao lea faatoa iloa.
E lei faamatuuina aloaia o la igoa seia maea nisi o galuega a leoleo o loo fia faataunuuina peitai o nisi e silafia le aiga ua o latou faamaonia ane lea tulaga I le Herald. E le o fia faia se faamatalaga a o la aiga ile taimi nei ae ua faailoa o le po o le aso toonai faatoa tuanai atu na maua atu ai o la tino maliliu I le fale I Riccarton.
Faailoa e leoleo e leai se tasi o o latou sailia e tusa o lenei faalavelave ae ele o faailoaina foi ile taimi nei le mafuaaga ole maliliu ao talia ai le iuga o le post mortem. O molimau a nisi o tuaoi I le au faasalalau ua taua ai ua fai si leva e lei toe vaai i e ua maliliu mae manatu ua leai nisi o toe nonofo ile fale ona e foliga ua leva e lei toe faamamaina le fanua.
