Ua iai nei se fuafuaga a le Malo e faatino le tuuina atu o ni taui tupe mo tagata taaalo o le atunuu e aafia i ni manu’aga mai taaloga, o se faamanuiaga e lei faia muamua.

O lea ua foi atu nei i se komiti faapalemene mo le saga iloiloina o lea fuafuaga e ala i se tulafono taufaaofi e teuteu ai le tulafono autu o le faalapotopotoga o taui o faalavelave faafuasei le ACC poo le Accident Compensation Corporation.

O se tasi lea o tulafono tau faaofi sa tagofia e le Palemene i le Aso Lulu i le sini o fuafuaga a le Malo e tatau ona aofia tagata taaalo i ni faamanuiaga tau tupe e maua pe a lavevea ini taaloga.

O loo aiaia i teuteuga o loo fia faaofi i le tulafono autu, le tatau ona lesitala o tagata taaalo e mafai ai ona agavaa i se faamanuiaga.

O le tofa Leatinuu Wayne Sooialo le minisita o faalapotopotoga o faalavelave faafuasei i lana folasaga e faamanino ai teuteuga o loo fia maua iai se ioega a le fono aoao faitulafono.

O le tasi o tulafono taufaaofi o loo talanoaina o le faia lea o le pepa aloaia e iloa gofie ai tagata Samoa poo le National Identification Card.

O se taumafaiga e maua uma ai faamatalaga o tagata taitasi e faigofie ai ona maua faamaumauga ma faamatalaga o tagata taitasi, e faaaoga i soo se tautua i le atunuu e pei o le auaunaga a le soifua maloloina.

O loo tagofia muamua e le Palemene ia tulafono tau faaofi a o lei soalaupuleina le tala autu fou o le Tupe.