Maua se eseesega i teuteuga o nisi tulafono a le Palemene

Ua maea se sailiiliga a le Ofisa o le Fono Aoao Faitulafono na sailiili ai i ni mafuaaga na tulai mai ai se eseesega i le tulafono o teuteuga o le faavae ma le tulafono o Faamasinoga o Fanua ma Suafa o le tausaga 2020 lea na pasia e le palemene, ese le kopi o lea tulafono na pasia ma tuuina atu mo le saini iai o le aao o le afioga i le Ao Mamalu o le Malo. 

O lea ua faataoto nei i le laulauafono a le Palemene i lana tauaofiaga na toe usuia i le Aso Lua o le vaiaso nei lea ripoti o le taunuuga o suesuega ma o le a iai se taimi ona faaali lea iai o finagalo o sui usufono o le Fono Aoao Faitulafono.  O le a iloa i le ripoti i lea suesuega  sa taitai ai le Failautusi o le Fono Aoao poo fea na mafua mai ai le faaletonu.  

Ua faaalia e le Fofoga Fetalai i le Palemene o se taimi muamua lenei i le talafaasolopito o tulafono  e faaofi atu i  le fono aoao faitulafono ma pasia ua tupu ai se faafitauli ogaoga faapea. 

Taua e Papalii Li’o Taeu Masepau “ Ua maea ona faatino suesuega e le ofisa o le failautusi o le Fono Aoao Faitulafono ma ua o’u taulimaina foi le ripoti, e iai le talitonuga o le nofoa e lē tatau ona taatia umi pe taoto ai faaleiloga lenei faafitauli ona o tulafono e fesootai ma mataupu e iai talitonuga o loo tagofia e le faamasinoga. E lē gata i lea ae o mataupu faalefaamasinoga a le atunuu lautele o loo feagai ma i latou i le taimi nei , o se faafituali e patino lava i le Palemene lona toe poupouina. E na’o le Palemene foi e mafai ona toe faamautū ma faatulaga mo le saga tonu ai o le faatautaiga o le pitolaau o le faamasinoga mo le amiotonu ma le faamaoni o faaiuga i mataupu a le atunuu o loo faatōai atu i le faamasinoga”. 

Taua foi e Papalii “Talu ai ona o aiaiga o le faagasologa o le tatou galuega, e le mafai ai ona tatou sopo loa i aiaiga o tatou tulafono tumau ae ua o’u vave faailoa ona o se mataupu e ao ona faamanino i le faafofoga tapuai mai a le atunuu. O le taimi muamua lea ua tulai mai ai se faaletonu faapea ma ua faia le faaiuga a le nofoa e tusa o faiga masani e tatau ona faataatia le ripoti o lea suesuega mo le silafia e le maota”. 

O loo ave le faamuamua i le talanoaina o le tala faaaopopo maumua a le faigamalo fou  ona faatoa iloa ai lea o se aso e soalaupule ma talanoaina ai ripoti o suesuega i le faaletonu na tulai mai. 

Scroll to Top

Keep uptodate with Radio Samoa activity & promotion

* indicates required