Ua lipotia mai nei, le taofia ai e leoleo Otago Lakes Central i le latou vaega o le Impairment Prevention Team o se tagata na o latou maua o faatauina atu ni fuālaau faasāina o le maruana.
I faamatalaga e tauala mai i luga o upega tafa’ilagi a le Southern District Police, na faailoa ai, o lenei matāupu na tula’i mai i le amataga o le masina, ina ua mae’a sa latou galuega o poloka mo siaki masani i luga o auala i le feoa’i ai o taavale.
Faamauina a o tapena ai a latou meafaigaluega e tuua le nofoaga ae maua atu ni taavale se lua ua faatatafa ma aga’i i se auala pefu, na masalomia le māfua’aga ua aga’i ai nei taavale i ia itu.
Ta’ua e le satini na iai, Sergeant Dylan Hannah-Jones, na faatopetope ona aga’i ese le tasi o taavale ina ua latalata atu leoleo e iloilo le matāupu ma tulaga o iai taavale nei.
O le isi taavale e faapea na taumafai atu leoleo e fesiligia le avetaavale ae na musuā e talanoa i se isi, o lea na faailoa atu ai loa e leoleo tulaga o le a taofia ai o ia.
A o faatino gaioiga a leoleo, na o latou māua le manogi o le maruana, o lea na faatino ai loa su’esu’ega i le taavale ma o i lea na maua ai loa se tino i tupe e 10,000 ma le lata i le 9 aunese o maruana, ma le fuālaau faasāina o le magic mushrooms.
I sa’ili’iliga a leoleo, na māua ai o le taavale na alu ese faatopetope, o se tagata na alu atu e faatau se fuālaau faasāina.
Ua molia nei le avetaavale na taofia i le tele o moliaga e fesoota’i i fuālaau faasāina, ma le moliaga o le lē usita’ia o tulaga o le fesiliga ai o le tuuina o le pin o le telefoni.
O le tagata faatau, ua faamauina o loo iai ni tuutuuga e lē tatau ona ia toe faafoeina se taavale, o lea ua māua le ave ese faamalosi o lana taavale ma ua tuu iai se tusi samania i le tatau ai ona oo atu i le faamasinoga.
Puna o Faamatalaga: https://www.facebook.com/share/p/19rAKDCiDV/
