I tala mai Hawai’i o loo ta’ua ai le sailia e le aiga o si tamaitai talavou na maua lona tino maliu i totonu o se taavale ua susunu i le kapaka a le Mililani High School. Ua taofia e leoleo mo suesuega le uotama a lenei tamaitai o loo masalomia i lenei faalavelave.

O le tamaitai talavou o Laau J Laulusa, e 21 tausaga le matua, o se fitafita tamaitai i le Hawai’i Army National Guard (HIARNG) talu mai le 2019.

O le aso 25 o Mati lea na faamaonia mai ai e leoleo lē ua molia i le fasioti tagata faamoemoeina i le second degree ma le moliaga o le susunu ma le loto iai o se meatotino (arson) i le first degree. Ua faatulaga le $1 miliona e totogi e tatala ai i tua e faatali le aso e tulai ai mo le valaauga o lona faamasinoga.

Ua faaleo lagona faanoanoa o le aiga o lenei tamaitai talavou, ma e lē o nofo filemu o latou lagona i lenei taimi i le tau mafaufau poo le ā tonu le mafuaaga o lenei faalavelave matautia.

Ta’ua e lona aiga, e leai so latou iloa o iai se faaletonu i le mafutaga a Laau poo Jordan ma le alii sa la faauo.

O le faanaunauga o lenei tamaitai e pei ona ta’ua e si ona aiga, e fia auai atu i le Army National Guard ina ia maua ai lona avanoa e tautua mo lona atunuu.

Sa iai foi ona moemitiga e fia malaga taamilo e maimoa i le lalolagi, ae pagā lea ua motusia faafuasei le mafutaga a o lei mafai ona ausia uma ana moemitiga.

Mo le taimi nei, o loo taula’i le aiga i le sailia o le mea moni na tupu ma ia faia le faamasinoga tonu mo si o latou afafine.

Faaleo foi le agaga faafetai o le aiga ia i latou na agai e tulituliloa le alii ua masalomia a o taumafai e sola ese ma mafai ai ona latou fesoasoani i leoleo e pueina lenei alii.