O le afiafi po o le Aso Gafua o lenei vaiaso na manuia ai sa’iliga a leoleo ma ua toe maua ai le pagota o Lauititi Tualima na sola ese ma le falepuipui i Tanumalala i le faai’uga o Ianuari.

O se pagota o loo tuli ona faasalaga i nisi o solitulafono ogaoga e aofia ai le tosoteine.

E lima afe tala na ofoina e le matāgaluega o leoleo o se taui mo se tasi e maua ai ni faamatalaga e tau sa’ili ai se nofoaga o faamautū ma lafi lafi ai Lauititi.

O A’ele o loo ta’ua i se ulua’i lipoti mai le nusipepa o le Samoa Observer na maua iai le pagota, ma o loo su’esu’eina ai e leoleo i latou i le nofoaga na maua iai Lauititi.

Ua savali nei i le lua masina o faia sa’iliga a se vaega faapitoa o leoleo na tuu iai le galuega e sa’ili ia maua le alii pagota ua toe loka nei i le falepuipui i Tanumalala.

Ua momoli le faafetai a le Komesina ma le matāgaluega o leoleo, falepuipui ma le toe fuata’ina i le atunuu sa fesoasoani atu ia latou sa’iliga.

E lē o faailoaina e leoleo poo le fesoasoani na maua ai faamatalaga i le nofoaga na faamautū ai Lauititi, o le a maua ai e se tagata ma le taui e lima afe tala sa latou faailoa lautele.

O le alii pagota o Lauititi Tualima ua 32 tausaga le matua mai afio’aga o Satapuala ma Luatuanuu.