O se fiafiaga i tagata na faaleagaina fale ona o lologa i le amataga o le tausaga le fesoasoani tupe ua faailoa mai e le malo.
O lea ua faailoa mai e le Sui Palemia, Carmel Sepuloni e iai le fesoasoani tupe e le o toe mamao ona maua mai lea e fesoasoani i tagata ua o ese mai o latou fale na faaleagaina e lologa ona ua lē saogalemu ma o lea ua nofo mau totogi i isi fale.
A o nofo mautotogi ai pe rent i isi fale ese o lea lava foi e totogi o latou fale ua faaleagaina, poo se tala faafaigofie e lua fale o loo totogi, fale o loo iai nei ma le fale e lē o nofoia.
Saunoa Sepuloni, o le aso 4 o Setema e amata avanoa mai ai lenei peimeni ma e totogi mai i vaiaso taitasi.
Ua lipotia ai e le leitio a Niu Sila le toatele o tagata Aukilani i Sisifo ua faaalia lo latou agaga faafetai ona e le o faigofie le taufaasoa e totogi uma fale e lua i le taimi e tasi.
O le aofaiga faataitai ua faailoa mai, i Aukilani mo le aiga toafā o le a totogi mai iai le $610 i le vaiaso, ae i Hawkes Bay e tusa ma le $510, ae o Gisborne e $460 i le vaiaso ma o loo fua lava foi e pei o le faiga o loo totogi mai ai le Accommodation Supplement i le taimi nei.
E amata totogi mai lenei fesoasoani tupe mai le aso muamua o Iuni ma o le aso 21 o le masina fou e mafai ai ona amata fesootai tagata ua aafia i le Ministry of Social Development.
