E ui o loo iai pea aiaiga a le matāgaluega o femalagaa’iga a Niu Sila e talosaga ai i se visa asiasi mo tagatānuu o Samoa ma isi motu o le Pasefika, peita’i ua iai ni suiga ua tau maua ai se to’a i le tulaga lea o le umi o faatali pe manuia se talosaga mo sea ituaiga o visa.
I le faailoa lautele mai ai e le vaega o femalagaa’iga a Niu Sila i Apia o lea faai’uga ua molimauina ai o se tasi o suiga, o le maua lea o se visa asiasi e mafai ona femalagaa’i ai poo multiple travels ae e mafai ona nofo ai i Niu Sila i le umi e 6 masina.
O le masina o Iulai o le tausaga nei e amata ai faamamalu ai ia suiga.
O Samoa ma isi atumotu o le Pasefika ua aofia i lea aiaiga, ma o atunuu ia e aofia ai Tonga, Fiti, Solomona, Papua Niu Kini, Vanuatu, Tuvalu, Kilipati, Nauru, Palau, Federated States of Micronesia, ma le Atu Malesala.
O se tasi o aiaiga o soo se tagatānuu o ia atumotu e aofia ai ma Samoa e malaga i Ausetalia i se visa asiasi o lea atunuu e mafai ona malaga mai Ausetalia i Niu Sila e aunoa ma se visa asiasi, ae faaaogā faiga faaonaponei i fesoota’iga faatekonolosi.
O Samoa lava i lana feagaiga faauō ma Niu Sila o loo iai le finauga o le feagaiga lea ua tatau ai ona sa’oloto le malaga atu o o tatou tagata i Aotearoa e aunoa ma le toe faia o se visa, mo malaga i faalavelave faaleaiga ma malaga e asiasi ma tafafao ai i aiga ma uō.
E pei ona silafia ua onosefulu tausaga o lea feagaiga faauō ae o loo feoa’i atu lava o tatou tagata i Niu Sila i visa, ae malaga mai tagatānuu o Niu Sila i o tatou eleele e tafafao ma eva ai e lē tau faia se visa.
