O le tausaga fou o loo fuafuaina ai le malaga mai o fanau Samoa o loo aumau i San Francisco Amerika i le atunuu e tusa ai o se polokalame e faapupula ma fagufagu ai tu ma le aganuu a le atunuu ia i latou o loo aumau i atunuu mamao.
O le auga lea o le faamoemoe ma o le a mafai ona auina atu ai nisi o fanau o loo i le atunuu mo Amerika e mātau foi le olaga i San Francisco.
E pei ona faasalalauina ai i upega tafailagi lenei faamoemoe, o le vaitau e malolo ai fanau mai aoaoga i San Francisco lea o le a malaga mai ai i le faaiuga o le masina o Mati mo le lua vaiaso ae o le aumalaga a Samoa o le a malaga lea i le masina o Iulai o le tausaga fou.
O se polokalame mo lenei malaga mai i Samoa e aofia ai le auai lea i ni gaioiga o tu ma le aganuu, auai i polokalame faaleaoaoga faatasi ai ma ni faatinoga o auaunaga lautele.
O lenei polokalame o se galuega e vaavaalua ai le faalapotopotoga o loo tele lona sao i fesoasoani i fanau ma tupulaga talavou i le atunuu, le Brown Girl Woke ma le Samoa Solutions i San Francisco ma o nei faalapotopotoga ua loa tausaga o galulue faatasi i le faatinoina lea o fesoasoani mo tagata Samoa i Amerika ma Samoa nei.
O le a taimua nei faalapotopotoga e talimalo mo lenei faamoemoe i le tausaga fou.
