O galuega o loo faagasolo nei a le komisi su’esu’e o faigapalota, o se latou lipoti o le a tuuina atu i le Palemene o le a tali ai atugaluga o le sui faipule o Faleata Numera 4 le tofa Ale Vena Ale, e pei ona ia talosaga ai i le Minisita o Faigapalota ma le Malo, e toe silasila i le teuteuga o le tulafono o faigapalota ua lē mafai ai ona avea ma sui tuto’atasi se faipule ua fia alu ese ma tuua se vaega faaupufai.
I le finagalo tali o le Minisita o faigapalota le afioga Faualo Harry Jeffrey Schuster i lea mataupu na ia talosagaina ai le atunuu e aga’i e faaali o latou lagona i le komisi suesue o loo savalia nuu ma itumalo, auā o o latou lagona o le a taoto mai ai se isi faafanua o le tulaga o le tulafono o faigapalota o loo aiaia ai ma vaega i sui faipule e fia oese ma pati faaupufai e pei ona fesiligia e le faipule o Faleata Numera 4.
O le komisi suesue foi o loo ave ai le fesili i ni finagalo i tulaga i Vaega faaupufai e maua ai se tali o le isi lagona o le tofa Ale Vena Ale, pe lē ua tatau ona aiaia se vaegatupe mo faatosina a sui tauva i se palota e saili ai tofi o itumalo i le Palemene, ae ia iai se tapulaa o ia tupe ma lipoti i le ofisa o le komesina o faigapalota le faaaogāina.
