E le’i lelei ona pulea e le Oranga Tamariki le polokalame $60 miliona e fesoasoani ai i fanau ua aafia mai feusuaiga lē manuia ma o lea na taofia ai loa.

O le faaiuga lea o iloiloga a le vaega tutoatasi na iloiloina lenei polokalame, ma o le lipoti ua tuuina mai e le’i lava tapena, lē lelei ona faataatia ma nenefu ma o le mafuaaga lea o le lē toe faia.

Peitai, o nei mea uma na faalilo uma e le’i faailoaina mai i le atunuu pau o lea sa sau o tala o loo lelei ma e le’i faigofie foi ona tāpā mo le iloiloga na faia nei.

O le faai’uga o le 2019 na tuuina atu ai i le Oranga Tamariki na te faia suiga o auaunaga e lua mo fanau ma o se tasi o polokalame e lagolago ai anavatau a le malo se’i fesoasoani ai i feusua’iga lē manuia o loo alia’e mai i totonu o aiga.

O le $60 miliona foi na faamatuu mai mo le polokalame na fuafua mo le 4 tausaga, ma a o fofoga mai ai i luma e faauluulu e faapea o loo lelei mea uma, ae lē o iuga ia ua maua mai su’esu’ega na faia.

O se tasi o itu faigata ua maua nei o le leai o ni faamaumauga o le paketi e iloa ai mea na fai ma le tupe na alu.
Ona o le leaga tele o le faafoeina o lenei polokalame na tapunia ai loa ia Aukuso o le 2021 ma i lea taimi ua amata iloiloga lea e sau ai le lipoti ua faalauiloa.