O faailoga na taulimaina e le asosi o le Best Technical Performance ma le Best Coverage ma o nei faailoga e faailoa ai le agaga faafetai o le asosi lenei e tusa o le amanaia o sa latou auaunaga ma se tautua i le atunuu e ala i lea mautinoa lelei o le suavai taumafa mamā.
I pepa o faamatalaga faalauaitele o le fonotaga lea a asosi o suavai ma suavai lafoai poo le Pacific Water & Wastewater Association lea na faailoa ai nei faailoga ma o nei faailoga e faailo ai le auaunaga a le S.I.W.S.A. ma le naunautai o lenei asosi ina ia mafai ona tuuina atu le suavai mamā ma lelei auā le fofoga taumafa o le atunuu.
E pei ona faaalia e le Peresitene, Asi Sasa Milo le agaga faagaeetia i le amanaiaina o se auaunaga faatauvaa a le asosi.
“E talia ma le loto e tumu i le faaaloalo e tusa ai o le faaeaea ua tuuina mai mo le matou asosi ma o le molimau lea o galuega o loo faatinoina e le asosi ma ana paaga ina ia faamausali ma mautinoa o loo matou tautuaina le atunuu e ala i auaunaga tau suavai.”
E afua mai le faamanuiaina o le asosi i faailoga nei e tauala mai i faamaumauga ma lipoti na aoina e le P.W.W.A. ma sa faaalia i lea fonotaga.
O le P.W.W.A. o se tasi o faalapotopotoga maualuga ma faaaloalogia o loo aofia ai sui auai e 31 mai le 21 O atunuu i le Pasefika ma o le manulauti o le faaleo lea o le tausia ma le malupuipuia o suavai i le Pasefika o le unaia o atina’e o vaega o loo nafa ma auaunaga tau suavai i le Pasefika.
O le taulimaina o nei faailoga e le asosi o se faamalosiau lea ia faaauau pea isi lassaga o ana auaunaga e fai lea ma sao i fuafuaga alualu mamao a Samoa mo ana atina’e aemaise vaega tau suavai i le atunuu.
O le asosi a le S.I.W.S.A. sa faavaeina i le tausaga 2008 ma o se tasi o ana paaga o le Iuni a Europa lea na faamatuu mai ai se vaega tupe e fesoasoani i nisi o poloketi sa taulamua ai lenei asosi i le faatinoina i totonu o afioaga e pei ona iai se tasi o poloketi ua mae’a fausia i le afioaga o Solosolo auā le tausia o le suavai mamā.
