E silia ma le ‘afa o gasegase o le kanesa e matele ina faatoa iloa ina ua agai atu gasegase i le vaega o le emergency a le falemai ma tele ina tuai tele lea taimi e iloa ma togafitia ai, o le faamatalaga lea mai se lipoti fou ua faailoa e le Cancer Control Agency.
Ua iloa ai foi o le ‘afa o isi ituaiga kanesa e faatoa matele ina iloa i le taimi e taofia atu ai i le emergency ma maualuga ai foi le tulaga lamatia o le soifua mai ia gasegase.
O le fomai polofesa i le matata lea Chris Jackson na ia ta’ua o le lipoti ua iloa ai ua leva ona faatali gasegase mo le vaaia o se fomai faapitoa, specialist poo se GP foi ma faigata foi mo fomai ona faia ni suesuega mo le tele o isi ituaiga kanesa.
O nisi ia o mafuaaga e mafua ai ona faatoa iloa kanesa o isi ua oo i ni tulaga ogaoga ma sili atu ona tele le faaletonu lea i Niu Sila pe a faatusatusa i isi atunuu.
Fai mai le lipoti e sili atu ona ogaoga le tulaga lea, o le faatoa iloa o kanesa o loo aafia ai i le emergency, i gasegase Pasefika ma Maoli pe a faatusa i papalagi.
