E maoa’e le vaaiga na silasila iai nisi o auusufono sa auai i le fonotaga a taitai o le Pasefika e pei ona usuia ai i le Atu Kuki, mai le aso 7-9 o Novema, i le afiafi ananafi ina ua faatino faaaloaloga a le auaiga o le Ngāti Maoate clan, mo le afioga i le Tamaitai Palemia o Samoa, Afioga Fiame Naomi Mata’afa faapea le Kovana o Amerika Samoa ma la auusufono.
O lea faatasiga faapitoa na faia i le Pa Ariki Palace.
O meaalofa sili ona tāua o faiva alofiaao a le atunuu, sa gasolosolo ane ma tamaitai, o tina ma fanauiti e molimoli ane ma faailoa ai lo latou mitamita ina ua mafai ona feiloai totino i le afioga i le Tamaitai Palemia.
O le auaiga lea o Ngāti Maoate, e iai o latou sootaga toto i le aiga Sa Mata’afa i Samoa, o le mafuaaga sili lea ua saga’i ane ai e fai lenei faaaloalo tele mo le Tamaitai Palemia, o se alo e faasino i le Mata’afa.
Na faalauiloa ai foi i lea afiafi se meaalofa na foai ane e le Alii Sili, Chief Maoate Mataiapo Kiriau Turepu, o lona great grandmother o le tina ia Lafala Mata’afa; ua faameaalofa ane ai e lea auaiga le ‘afa eka o lo latou fanua i Titikaveka e fausia ai se fale e tapuvaetasi iai meafai a tagata Samoa o loo aumau i Rarotonga.
Na liliu foi le Tamaitai Palemia ma lana aumalaga ma faatino le latou faaaloalo e ala i meaalofa na foai atu, e aofia ai le measina a Samoa, le Siapo.
Na mae’a lea faaaloaloga ona auai atu lea o le Afioga i le Tamaitai Palemia i se tausamiga na tapenaina e le mamalu o Samoa o loo aumau i lea atunuu, i le Ariki Café.
