A o faagasolo ai pea suesuega a leoleo i le setete o Vitoria i Ausetalia i le mafuaaga tonu o le faalavelave tau taavale ua fano ai soifua o ni tama tane se toafā mai Samoa sa malaga i galuega faavaitaimi, ua faailoa e leoleo o lea setete i se lipoti lata mai, o le avamalosi ua masalomia e iai lona sootaga i le mafuaaga o le faalavelave.

Ua faailoa e le taitai o le aufaigaluega faavaitaimi sa galulue faatasi ma i latou ua maliliu, o le tala ane foi lea a nisi sa mafuta iai i latou ua fano soifua, sa tagofia le avamalosi.

Ua faailoa mai e le taitai o le aufaigaluega faavaitaimi sa galulue ma i latou ua maliliu, sa fautuaina e tofafā se’i oo i le taeao o le Aso Sa ona malaga lea peitai sa tuua lava e i latou le nofoaga sa tafafao ai po ua tu lata i le vaeluaga o le po.

Ua faailoa lautele i lipoti mai Ausetalia suafa o i latou ua maliliu lea e aofia ai, David Gasologa, Alesana Anitele’a, Aperaamo Tapelu, ma Derek Amouta Peleti.