Ua savalia aso e fā talu ona amata faasavali le sulu o le filemu a le faalapotopotoga o le Toomaga mo ē Puapuagatia, e faalauiloa ai pea le tetee atu i le sauaina o tina ma tamaitai ma fanau teine a le atunuu.

Ma ua faailoa e le peresetene o le faalapotopotoga le maualuga o le faatali ma le lagolago atu a nuu ma afioaga ua pasia e le sulu o le filemu, lea na taunuu i le itumalo o Safata i le aso ananafi.

Na molimauina ai le sagisagi ane o le toatele o tagata i le afioaga o Vaiee o se tasi o nuu ua fai ma lamepa susulu mo le Toomaga ma lana auaunaga i le atunuu aemaise lava i le tetee atu i sauaga.

Faaalia e le faletua o Siliniu Lina Chang le peresetene o le Toomaga, e leai se afioaga e lei talileleia le oo atu iai o le sulu o le filemu, aemaise o le faamaopoopo ane o faafeagaiga ma ekalesia e pei ona sa molimauina ina ua oo atu le sulu o le filemu i le nofoaga o loo iai le kolisi faafaifeau i Piula a le Ekalesia Metotisi.

E 10 aso o loo faagasolo ai le faasavaliina o le sulu i lo tatou atunuu atoa.