Ua faamauina le maoa’e o le foai tupe a tagata lotu o le Ekalesia Faapotopotoga Kerisiano Samoa e ala i lana faiga taulaga o le Talalelei lea e faatupe ai galuega faamisionare a le ekalesia i le lalolagi.
O le lotu faamisionare i le afiafi o le Aso Tofi na faailoa ai e le Failautusi Aoao o le Ekalesia le susuga Vavatau Taufao, o le tausaga e 2021 e silia i le 6 miliona tala na maua i le taulaga o le talalelei, ae o le tausaga na tea nei 2022 e silia i le fitu miliona tala.
O nisi o tupe mai lea faiga taulaga ua faatupe ai nisi o fesoasoani a le ekalesia o loo ofoina i Samoa mo le nofoaga o loo nofosala ai tupulaga talavou i Olomanu ma falepuipui autu i le atunuu, ma o ni polokalame na faaalia e le failautusi aoao ua fesoasoaani ai i le ola aoaoina o tupulaga ua nofosala ona o soligatulafono ua toe tapue ai o latou olaga i le aoaoina o tomai e mafai ona maua ai ni galuega pe a mae’a tuli o latou faasalaga.
Ua momoli ai le faafetai a le failautusi aoao e avea ai ma sui o le laulau a le taitaifono aoao ma faauluuluga o le ekalesia i le soifua ma le ola fai taulaga o ona tagata mo galuega faamisionare a le ekalesia i Samoa ma atunuu e mamao.
