Toe tasi le taaloga a le Junior Manu Samoa o loo totoe, toe o le taaloga ma Fiti lea e faia i le vaiaso fou le aso 6 Mati ona mae’a loa lea o le taamilosaga o le Oceania Rugby e pei ona faatasi mai ai i Aukilani. 

Ua mae’a lana taaloga muamua ma le Moana Pasifika ma sa faia’ina ai, ae o le taaloga ma Tonga o le taaloga faitaulia lea o le taamilosaga ina ia mafai ona maua ai se avanoa o le Junior Manu Samoa i le World Rugby Trophy i Scotland ia Iulai. 

O le Aso Toonai 2 o Mati na fetoai ai le malolosi o ‘au a atunuu e lua i le malae o North Harbour Stadium e saili ai poo ai le ‘au e alu a o ai e nofo i lea taamilosaga. 

Peitai na maitauina le tulaga maoae ma le manaia o tapenaga a le Junior Manu Samoa i lana taaloga ma Tonga i lea aso ina ua maimoa ma silasila iai le lalolagi atoa i luga o tv ma upega tafailagi i osofaiga a le Junior Manu Samoa. 

O le ‘afa muamua o le taaloga na vave tau’ai ai le ‘au a Tonga ina ua latou laasia le laina sikoa a le Junior Manu Samoa ma tulai mai ai a latou ‘ai e 7 i le leai a le Junior Manu Samoa. 

E lei faavaivai le susuga i le alii kapeteni ia Wally Tau Vesi i le toe faamalosi i lana ‘au auā se ‘ai o le ‘afa muamua. 

O le alii o Harry Hanipale o le prop numela 1 na mauaina le sikoa mo le Junior Manu Samoa, ona toe sikoa lea o le numela 14 le alii o Panaua Levaea ma le sikoa lona tolu na maua lea e le alii kapeteni ia Wally Tau Vesi faatasi ai ma ana kiki i le pou sa ova lea na tulai mai ai ‘ai o le Junior Manu Samoa i le ‘afa muamua 22 i le 7 a Tonga. 

O le ‘afa lona lua o le taaloga na toe mataina ai foi le osofai malosi o le ‘au a le Junior Manu Samoa ma sa toe laasia ai foi e le numela 9 le alii o Faalava Toetu Tuamasaga le laina sikoa faatasi ai ma le sikoa a le numela 8 ia Malaesaili Elato ma kiki a le kapeteni i le pou na ova ma maua ai isi ‘ai faaopoopo mo le Junior Manu Samoa ma manumalo ai i le la taaloga ma Tonga i le 40 i le 14 a Tonga. 

Ma o se taaloga ua faafiafiaina ai le tapuaiga a le atunuu aemaise o le ‘au atoa ma le pulega a le Junior Manu Samoa ona o lea ua tau lau o le faamoemoe na finau ai i lenei taamilosaga. 

Ma ua faamautuina nei le avanoa o le Junior Manu Samoa i le taamilosaga a le World Rugby Trophy i Sikotilani ia Iulai o le tausaga nei.