O se faai’uga a le Faamasinoga Maualuga na faatino e le afioga i le Faamasino Sili na faapafala ai se faasalaga o se taulealea, e aunoa ma le faamaonia o lona moliaga o le lima tagoese a o avea ma tagata faigaluega, ua faalēaogā e le faamasinoga o talosaga apili, ona e lē talafeagai vaega o le tulafono na faavae ai lea faai’uga.

O le faamatalaga tusitusia sa tuuina atu e lē na molia i le faamasinoga a o lei faia le faai’uga sa ia ta’utino ai lona sese i lona toesea o ni meatotino a se kamupani sa galue ai.

O ia meatotino o se iMac desktop computer ma se Mini PA system.

Sa ia faailoa foi i lana faamatalaga lona salamō faamaoni ma e lē toe faia lea solitulafono.

I le iloiloina e le Faamasino Sili o lana faai’uga sa ia talia ai le talosaga a le loia a lē na molia ina ia faapafala se faasalaga e aunoa ma le faamaonia o ni moliaga.

O le talosaga a loia a leoleo ia faia se faasalaga faafalepuipui e lua tausaga.

Peitai o le faai’uga e lē faasalaina ma lē faamaonia le moliaga na mafua ai ona toe apili e loia a leoleo le i’uga ma aumai ai le togisala a le faamasinoga o talosaga apili, e nofo vaavaaia lē ua molia mo le 18 masina ma le 50 itula e galue fua ai mo le lelei o tagata lautele.