O le Best Commemorative Banknote of the Year o le faailoga lea ua faailo mo le $60 tala pepa a Samoa o se tupe pepa faamanatu ua sili i lenei tausaga.
E pei ona faasalalauina ai e le kamupani na mamanuina ma lomia le De La Rue i Peretania, o lenei faailoga na faailoa i se tasi o faamoemoe na faatautaia e le High Security Printing Asia i Sri Lanka.
O le masina o Me o le tausaga nei na tatala aloaia ai le $60 tala pepa lenei, o se tupe pepa e faamanatu ai le faaiuga o le 60 tausaga o le Tutoatasi a le atunuu ma o se tasi o vaega tāua o le talafaasolopito.
O le tupe pepa i le pito i luma o loo lomia ai le ata o le Palemia o Samoa, Afioga Fiame Naomi Mataafa o le Palemia tamaitai muamua lea a le atunuu ae o le pito i tua o loo lolomiina ai le ata o lona tuaa, Afioga Fiame Mataafa Faumuina Mulinuu II, o lē sa avea ma Palemia muamua o Samoa i le 1962.
O loo faailoa ai le agaga fiafia o le Kovana a le Faletupe Tutotonu a Samoa, Maiava Atalina Ainuu-Enari, “O se mitamitaga i lenei foi faaeaea ma e faafetaia ai le kamupani a le De La Rue i le faipaaga ai ma le Faletupe i le mamanuina ma le lolomiina o le tatou tupe pepa fou lenei.”
E 1 miliona le aofai o lenei tupe pepa sa lolomiina ai i se tau aofai e silia ma le $2 miliona.
