Talu ona suia le laina tuaoi ua iai Samoa e pei ona sa faatino e le faigamalo talu ai, na avea le taualuga ia Samoa o le faafeiloa’iina o le meleniuma fou, na avea ai foi ma atunuu ua muamua faamanuia ma faafeiloa’i le tausaga fou.
O loo tumau pea le muamua tuvae Samoa i le tausaga fou ae ua iai le suiga i lenei tausaga ua leai se faaaliga o mea faapāpā poo fireworks display e pei o isi atunuu o le lalolagi.
Ua mafua lea suiga ona ua silasila le malo ua taugatā ma tele tupe e alu ai, lea e silia i le 400 afe tala le tau e aumai ai mea faapāpā mai fafo ma malaga mai ai ma tagata e faia lea galuega.
O lona uiga i le tausaga nei i Samoa e iai le matega o le a tumutumu nei malumalu tapua’i i lotu o le vaeluaga o le tausaga fou, ia poo le fifilemu o le tagata ia i lona fale ma fai lana lotu faafetai ua aulia le tausaga fou.
E faamanuia atu le Tausaga Fou i lo tatou atunuu i soo se tafa o le lalolagi. Happy New Year!
