O le faamanatu ai o le aulia o le 61 tausaga talu ona tutoatasi lo tatou atunuu mai pulega faakolone a isi Malo, e le tatau ai ona galo le sao ma le galuega a tuaa ma matua na latou asaina taimi faigata a o lumanai le uluai tutoatasi.

O se tasi lea o feau tāua na momoli mai i le malelega faamanuia o le 61 tausaga o le tutoatasi, ina ua malele le afioga i le Ao o le Malo, le afioga i le Tamaaiga, Tuimalealiifano Vaaleto’a Sualauvi II.

O lana malelega na ia faatāua ai le tāua o le totō pea i fatu o tupulaga lalovaoa o Samoa le tāua o le faamanatuina pea o le Tutoatasi na maua ai le Malo saoloto ua pulea ai e tagata Samoa ona upufai o Malo ma faatino le tautua mo le atina’e o le atunuu aua le manuia o taumafaiga o le tamaoaiga e tua iai tagata uma.

Se vaega o le malelega faamanuia mai le afioga i le Ao o le Malo, afioga Tuimalealiifano Vaaleto’a Sualauvi II.

O Malo faaaloalogia sa auai i le faamanatuina o le 61 tausaga o le tutoatasi ma avea ai le Aso Tofi le aso muamua o Iuni o lenei tausaga 2023 ma aso malolo mo tagata uma, o le Palemia o le Malo Fiti Sitiveni Rambuka ma lona faletua, o Sui Palemia o Malo o le Atu Kuki ma Tonga, Sui Palemia o Niu Sila, o le Ulu o Tokelau, le Kovana Sili o Amerika Samoa, ma le sui Faipule o le Konekeresi i Uosigitone le afioga Uifaatali Aumua Amata.

O le mae’a o sauniga uma o le faamanatuina o le 61 tausaga o le tatou tutoatasi i savali faaaloalo ma faafiafiaga sa lautogia ai nisi o afioaga o itumalo faapalota e tolu o Palauli 2 poo Palauli le Falefa, Aiga i le Tai ma Aleipata Itupa i Lalo, na tapunia ai polokalame uma i le saunoaga a le taitaifono o le komiti o le tutoatasi le afioga i le tamaitai Palemia.

Le afioga i le Palemia o le taitaifono o le Komiti o le Tutoatasi, afioga Fiame Naomi Mataafa.

Ua toe faaauau galuega masani ma isi auaunaga i le atunuu i le Aso Faraile le faaiuga o lenei vaiaso.