I le 81 moliaga a leoleo na tuuaia ai Sera Skelton sa faauluulu iai le vaega o auaunaga lautele e aofia ai ma tupe a le matagaluega o faamasinoga poo le corporate service, ua toe tolopo le valaauina o molimau, ae se’i iloilo muamua le talosaga a leoleo mo le toe aveese ma faaui i tua o moliaga e 81, ae suia i le moliaga e tasi o le lima tagoese a o avea ma tagata faigaluega na aafia ai se tinoitupe e 20 afe tala.

E lei faigofie i le afioga i le faamasino susuga Leiataualesa Darrel Clarke, ona talia le talosaga a le loia a leoleo ona e iai sana faaiuga i se mataupu faapea sa ia ave i loia a itu auai e silasila iai, ma faavae ai se tapenaga e tuuina atu e lagolago ai lea talosaga.

Na faailoa e le afioga i le faamasino ina ua valaau le mataupu i le Aso Lua o lenei vaiaso e tatau i loia a leoleo ona tuuina atu ni mau ‘anoa e faavae ai le talosaga e toe ave i tua moliaga e 81.

E tatau foi i loia a leoleo ona tuuina atu se talosaga aloaia poo se motion e pei o aga masani a le faamasinoga, nai lo le avatu o le talosaga tuu fofoga e aunoa ma se finauga tusitusia. 

O Fepuari o le tausaga nei i le tasi o valaauga o le mataupu lenei, na faailoa ai e leoleo le faaui i tua o moliaga o se tasi o tamaitai sa molia faatasi ma Sera, ona ua malie e molimau mo le itu a leoleo.

E silia i le 300 afe se tupe na faaalia e leoleo i le taimi o a latou suesuega sa masalomia le aafia i le solitulafono.

Ua savalia nei le lima tausaga o tālia le taimi e suesueina ai mau a leoleo i le mataupu, lea ua tālia muamua se faaiuga pe talia le faaui i tua o moliaga e 81.