Ua mana’omia tele e le auaunaga a faletalimalo ma fale’aiga le toe a’oa’oina o tagata faigaluega i galuega fai o lea atina’e tāua i le tamaoaiga, a o lei toe tatala tuaoi faavaomalo o Samoa mo le toe malaga mai o tagata tafafao mai fafo.

O le mafuaaga o lea mana’omia ona e to’atele i latou sa aoaoina i le faia o galuega i le tautuaina o tagata tafafao ua malaga i galuega faavaitaimi i Niu Sila ma Ausetalia, ma o nisi o i latou ua maua tusipasi ma faailoga i le faatinoina o galuega eseese. Na faaleo lea mana’oga i le fono a sui o faletalimalo ma isi atina’e tau tulisi i le atunuu, a o tapena ai e toe tatala auaunaga nei mo malo mai fafo.

O lea ua faataoto mai i le tala autū lona 2 o le Tupe a le Malo se isi fesoasoani o le a tuuina atu mo ia atina’e e fesoasoani ai ia latou tapenaga mo le tatalaina o a latou auaunaga mo tagata tafafao.