Ua lipotia mai i le fono lona 52 a taitai o Malo o le Pasefika o loo usuia nei i le Atu Kuki, le faaleo o se atugaluga o le Palemia o Samoa le Afioga Fiame Naomi Mataafa, i le auala na faaaogā poo le process na filifilia ai lē sa avea ma Peresitene o le Malo Nauru e na te tauaveina le tofiga Faulautusi o le Fono a Malo o le Pasefika, pe a mae’a le taimi galue o lē o loo seei i le tofiga i le taimi nei, o Henry Puna sa avea ma Palemia o le Atu Kuki.
I se lipoti a le leitio faavaomalo a Niu Sila i le Pasefika i le afiafi ananafi na faaalia ai o le tuualalo a le Palemia o Samoa ia faatalanoa le auala na filifilia ai lē o le a avea ma failautusi i le mafutaga poo le Retreat a taitai o malo o le Pasefika o le a faagasolo i le faaiuga o lenei vaiaso.
Faaalia e le leitio a Niu Sila o taualumaga o le fono i le Aso Tofi o le vaiaso nei, na solomuli ese ai le Peresitene o Nauru ma lana auusufono e lei auai, ina ua iai se finagalo o taitai o Malo e faatalanoa le filifiliga o le failautusi fou o le a tauaveina le tofiga, e pei ona autasi taitai o Malo Maikoronisia e see ane iai lē sa avea ma Peresitene o Nauru o Baron Waqa, lea o loo iai ni atugaluga o nisi taitai ona o loo iai ila o lea tagata a o avea ma taitai o lona Malo.
O ia ila o lona aiāina o le tutoatasi o le faamasinoga a Nauru e pei ona sa ia faamuta ai le taimi galue o lē sa avea ma Faamasino Sili, aemaise o aafiaga o tagata sulufai sa faamautu i Nauru.
Faaalia o le toe aliali mai o le solomuli ese o le taitai o lea Malo mai le fonotaga ananafi, ua toe foliga mai ai o le a vevela taualumaga o lea fono a taitai o le Pasefika ona o le mataupu lava lea na mafua ai ona teteva nisi o atunuu Maikoronesia e lei auai i le fono sa usuia i le tausaga ua mavae.
O Fepuari o le tausaga nei i se fono a taitai i Fiti na toe auli faamafolafola ai ia faaletonu ma toe malilie ai atunuu Maikoronesia na teteva, e toe ulufale i le fono a Malo o le Pasefika e pei ona auai i le fono o loo talimalo ai le Atu Kuki.
O le malilie o ia atunuu e faaauau ona avea ma sui o le fono a Malo o le Pasefika, ona o le a tuufaasolo le tofiga failautusi, i atunuu Polenisia, Melanesia ma Maikoronesia.
